Mar 16 | NAS | STEP | Doong Uaanaꞌmung tankinuioꞌ Meeriꞌ Maꞌdala-nani, Meeriꞌ Jeemisie bauko, eeꞌnoko Saalomeꞌ duuni tampaꞌ nuuraaꞌ mooꞌauꞌ Jiisuuꞌkoong mono sisiꞌkoo.

Mark 16

Jiisuuꞌ Daaꞌaruꞌnaꞌ Booꞌketa

(Mat 28:1-8; Luk 24:1-12; Jon 20:1-10)

1 Doong Uaanaꞌmung tankinuioꞌ Meeriꞌ Maꞌdala-nani, Meeriꞌ Jeemisie bauko, eeꞌnoko Saalomeꞌ duuni tampaꞌ nuuraaꞌ mooꞌauꞌ Jiisuuꞌkoong mono sisiꞌkoo. 2 Eeꞌnoko tero oraꞌka Saandei-naꞌmung kuvi dakoꞌdoma berouꞌ duaaꞌ mmeꞌ pataꞌuko. 3 Eeꞌnoko biiꞌka minkuarima aaꞌpaakoꞌ, “Niiꞌ deeꞌma baie kapang korimemuriiꞌnaang kuvi dakoꞌdoma karanaang-eta?” 4 Eeꞌnoko beroma kapang teketa kosiꞌarioꞌ ooauꞌ. Tee kapanooꞌ bakei aaꞌnaꞌ pankaing. 5 Eeꞌnoko tumpariruꞌ kuvi dakoꞌdoma. Eeꞌnoko teka narung naning nemaka ooauꞌ baꞌnamparioꞌ tampavine-aape. Bakaang mononopaꞌ kakaara kurunisi. Eeꞌnoko teing taꞌnimpariruꞌ tee-koo. 6 Eeꞌnoko teie aaꞌpuruꞌ, “Taꞌniniriaukaꞌ. Diiꞌke Jiisuuꞌ besiꞌerimang Nasaretiꞌnung aaꞌbarataꞌkoo taakavaieeng. Tee tee aꞌ otoaꞌ, tero daaꞌaring. Ooveriai aꞌ bempaieenooꞌ. 7 Enang berira aung kara nauereriaing bakaning barevare-nupoong tee ninka Piita, aaꞌperima, ‘Jiisuuꞌ diiꞌkoo uroꞌke bemaang Kaaleliꞌaape. Teka berira ooveriaing baka naururuꞌnaꞌ.’” 8 Eeꞌnoko kuvi dakoꞌdoma-ita avoroꞌke nopaꞌuri bakoarira kuaꞌpariri berouꞌ. Niiꞌning-ankoi kapooꞌ minkuaavaꞌ avoreaara.

Jiisuuꞌ Siraꞌparuꞌnaꞌ Teni Meeriꞌ Maꞌdalanani-ankoi

(Mat 28:9-10; Jon 20:11-18)

9 Damaꞌdue Jiisuuꞌ bouꞌnooꞌketa daaꞌarara tero maatanang doong Saandei-naꞌmung Meeriꞌ Maꞌdalanani-ankoi tutung oroꞌparuꞌ ~kenaanka-taa maꞌnari bataꞌuruꞌnani. 10 Eeꞌnoko tenie bera Jiisuuꞌ baꞌmarang nauvuruꞌ orarunsiarima birompariko. 11 Eeꞌnoko tenang tenie aaꞌpuriko, “Jiisuuꞌ daaꞌaring, ninge ooansing,” teing masikaꞌantavaavaꞌ bakaang kara.

Jiisuuꞌ Kenaankara Barevarera-koo Basiaruꞌnaꞌ

(Luk 24:13-35)

12 Teketa oovunara-pinaꞌ oroꞌparitaaꞌ bakaning-koonaanka taunga nanureko kuneꞌuretuꞌ osi-eta isipoꞌka. 13 Tenaankai toroareta napoꞌ nariong barevare-nupoong nauaaretuꞌ, eeꞌnoko teinge masikaꞌantavaareaꞌ beekaang kara.

Jiisuuꞌ Bakaning-koo Basiarara Mintoong Nkoaavainooꞌ Nauvuruꞌnaꞌ

14 Damaꞌke Jiisuuꞌ teing-koo nanaiꞌketa narung-koo basiaruꞌ taamanaako. Eeꞌnoko iikooꞌuruꞌ domamparioꞌ ooauꞌninge minkuaako noruꞌ tupuꞌpaaꞌ otoroi masikaꞌantavaariaruuꞌnung-koo. 15 Eeꞌnoko aaꞌpuruꞌ, “Ookara kansiꞌkoo naniriaing nantoong ookara-koo doorenang tampara daankierima. 16 Eeꞌnoko naning masikaꞌantavui ntong-koo minkiarara meekaꞌantavarara tee mooꞌaravaing, eeꞌnoko masikaꞌantavuaukaꞌnung Kumponinge kiimata-koo tampuaing. 17 Ning masikaꞌantamaavaining ninka aing eeꞌ oroꞌ taaꞌniꞌanta tavoꞌaravaing: Maꞌnari bataꞌaariainge nkaang miring-koo, eeꞌnoko oovunung karai kareaavai. 18 Bane boruꞌ kompaavainge eeꞌnoko bane dopa naiaama teie baikevuriaukaꞌ. Teinge biikaang bireng narung panteꞌaariko siipa-poꞌnupoong taarevoroaing.”

Jiisuuꞌ Paning-aape Koinuuꞌnaꞌ

(Luk 24:50-53; Kar 1:9-11)

19 Damaꞌdue Jiisuuꞌ teing ninka kareaakotaaꞌ baka siramparara paning-aape koinuuꞌ, eeꞌnoko Kumponing-koo tampavine-aape baꞌnamparuꞌ. 20 Eeꞌnoko bakaning barevare-nupoong avitoitoi nanauꞌ ookara osi-koo daankiarima. Ovoring nariꞌ teing ninka mintoomparuꞌ puring-antavurima biikaang kara taaꞌniꞌanta ninka tavoꞌanta-koo.